ᒪᒃᑯᒃᑐᑦ ᖃᐅᔨᓴᖅᑎᓪᓗᒋᑦ ᑲᑎᓐᓂᐅᑉ ᒥᒃᓵᓄᑦ

ᒪᒃᑯᒃᑐᓄᑦ ᖃᐅᔨᓴᕐᓂᕐᒧᑦ ᑲᑎᓐᓂᐅᔪᖅ ᑕᓪᓕᒪᓄᑦ ᐅᓪᓗᓄᑦ ᐱᓕᕆᐊᖑᕙᒃᐳᖅ ᐃᖃᓗᖕᓂ ᐋᖅᑭᒃᓱᖅᑕᐅᓯᒪᓪᓗᓂ ᓄᓇᕗᒻᒥ ᒪᒃᑯᒃᑐᓄᑦ ᐱᓕᕆᐊᖃᕈᓐᓇᕐᓗᑎᒃ ᖃᐅᔨᓴᕐᓂᕐᒥᒃ, ᐊᒥᖅᑳᖃᑎᖃᕐᓗᑎᒃ ᐃᓱᒪᒋᔭᒥᓂᒃ, ᑐᑭᖃᑦᑎᐊᖅᑐᒥᒡᓗ ᐊᑕᖃᑎᖃᓕᕐᓗᑎᒃ ᑐᙵᕕᓕᖕᓂᒃ ᐃᓄᐃᑦ ᑕᐅᑐᖅᑰᖅᑕᖏᓐᓂᒃ ᐊᑐᖅᓯᒪᔭᖏᓐᓂᒡᓗ. ᐊᐅᒍᔅᑎ 10-ᒥᑦ 14-ᒧᑦ, 2026-ᒥ, ᑲᑎᓐᓂᐅᓛᖅᑐᖅ ᒪᒃᑯᒃᑐᓂᒃ ᐅᑭᐅᓕᖕᓂᒃ 18-ᒥᑦ 30-ᒧᑦ ᓇᑭᑐᐃᓐᓇᖅ ᓄᓇᕗᒻᒥ ᐃᓕᑦᑎᔪᒪᓪᓗᑎᒃ ᓄᓇᓕᖕᓂ−ᐊᐅᓚᑕᐅᔪᓂᒃ ᐊᒻᒪ ᐃᓄᖕᓄᑦ−ᐊᐅᓚᑕᐅᔪᓂᒃ ᖃᐅᔨᓴᕈᓯᕐᓂᒃ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ, ᐅᖃᖃᑎᒌᖕᓂᒃᑯᑦ, ᐱᓕᕆᓪᓚᑦᑖᕐᓗᑎᒃ, ᐊᒻᒪ ᓄᓇᒦᑲᑕᒡᓗᑎᒃ.

ᐃᓚᐅᔪᑦ ᑲᑎᖃᑎᖃᕈᓐᓇᖅᐳᑦ ᐱᓕᕆᖃᑎᒋᕙᒃᑕᒥᓂᒃ, ᐊᔪᕈᓐᓃᖅᓴᖅᑎᑦᑎᔨᓂᒃ, ᐃᓐᓇᕐᓂᒃ, ᖃᐅᔨᓴᖅᑎᓂᒡᓗ ᑕᐃᒪᐃᓕᐅᕐᓂᕐᒥᓂᓗ ᕿᒥᕐᕈᐊᖅᓯᓐᓈᕐᓗᑎᒃ ᖃᓄᖅ ᖃᐅᔨᓴᖅᓯᓂᖅ ᐃᑲᔪᖅᑐᐃᔪᓐᓇᕐᒪᖔᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᓴᙱᒃᑎᒋᐊᖅᑎᑦᑎᓗᓂ ᓄᓇᓕᖕᓂᒃ, ᓴᖅᑭᑎᑦᑎᓗᓂᓗ ᐱᐅᔪᓂᒃ ᐊᓯᔾᔨᕐᓂᕆᔭᐅᔪᓂᒃ ᓄᓇᕗᒻᒥ. ᐱᓕᕆᓂᓕᒫᖓᓂ, ᐱᕕᒃᓴᖅᑕᖃᖅᐸᒃᐳᖅ ᐃᓕᑕᒥᓂᒃ ᐊᑐᖅᑎᑦᑎᔪᓐᓇᕐᓂᕐᒥᒃ ᑭᐅᓯᕙᒡᓗᑎᒃ ᒫᓐᓇ ᖃᐅᔨᓴᕐᓂᕆᔭᐅᔪᒥ ᐃᑲᔪᖅᐸᒡᓗᓂᓗ ᐋᖅᑭᒃᓱᐃᓂᕐᒥᒃ ᓯᕗᓪᓕᖅᐸᐅᔾᔭᐅᔭᕆᐊᓕᖕᓂᒃ ᓯᕗᓂᒃᓴᒥ ᒪᒃᑯᒃᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᙱᑦᑎᐊᕈᓐᓇᕐᓂᕐᒧᓪᓗ ᖃᐅᔨᓴᖅᓯᓂᕐᒥᒃ ᓄᓇᕗᒻᒥ.

ᖃᖓᑦᑕᐅᑎᑦ, ᑐᔪᕐᒥᔾᔪᑎᑦ, ᓂᕆᔾᔪᑎᑦ, ᐊᒻᒪ ᓄᓇᓕᖕᓂ ᐃᖏᕐᕋᔾᔪᑎᑦ ᐊᑭᓕᖅᑕᐅᓯᒪᔪᑦ ᑭᒃᑯᓕᒫᓄᑦ ᐃᓚᐅᔪᓄᑦ. ᐃᓚᐅᔪᑦ ᖃᐅᑕᒫᑦ ᑮᓇᐅᔭᖅᑖᖃᑦᑕᕐᒥᔪᑦ ᓇᖕᒥᓂᖅ ᐊᑭᓕᖅᓱᕆᐊᓕᖏᓐᓄᑦ ᐱᓕᕆᑎᓪᓗᒋᑦ, ᐊᒻᒪ ᑲᑎᒪᔾᔪᓯᐊᖅᑎᑕᐅᕙᒃᖢᑎᒃ ᓇᓗᓇᐃᖅᓯᓂᕐᒧᑦ ᐱᕕᖃᕐᓂᕆᓚᐅᖅᑕᖏᓐᓄᑦ, ᐃᓱᒪᒋᔭᖏᓐᓄᑦ, ᐊᒻᒪ ᐱᓕᕆᖃᑕᐅᓂᖏᓐᓄᑦ ᐱᓇᓱᐊᕈᓯᕐᒥ.

ᒪᒃᑯᒃᑐᓄᑦ ᖃᐅᔨᓴᕐᓂᕐᒧᑦ ᑲᑎᙵᓂᐅᔪᖅ ᒪᑐᐃᙶᖅᐳᖅ ᑭᒃᑯᑐᐃᓐᓇᓄᑦ ᐊᔾᔨᒌᙱᑦᑑᑎᓂᒃ ᐱᔪᒪᓂᖃᖅᑐᓄᑦ ᐱᓕᕆᖃᑦᑕᖅᓯᒪᓂᑰᔪᓄᓪᓗ. ᖃᐅᔨᓴᖅᐸᒌᕋᓗᐊᕈᕕᑦ ᖃᐅᔨᔪᒪᑐᐃᓐᓇᕈᕕᓪᓘᓐᓃᑦ, ᑭᒃᑯᓕᒫᑦ ᓂᐱᖏᑦ ᑕᐅᑐᖅᑰᖅᑕᖏᓪᓗ ᐃᑲᔪᖅᐸᒃᐳᑦ ᓴᖅᑭᑎᑦᑎᓂᕐᒥᒃ ᖃᐅᔨᓴᕐᓂᕐᒥᒃ ᐊᒃᑐᐊᓂᖃᓪᓚᕆᒃᑐᒥᒃ ᐃᓅᓯᕆᔭᐅᔪᓂᒃ ᓴᙱᓂᕆᔭᐅᔪᓂᒡᓗ ᓄᓇᕗᒻᒥ ᒪᒃᑯᒃᑐᓄᑦ.

ᑖᓐᓇ ᑲᑎᓐᓂᕆᔭᐅᔪᖅ ᖁᕕᐊᓱᒍᑎᖃᖅᐳᖅ ᐊᔾᔨᒌᙱᕈᓘᔭᖅᑐᓂᒃ ᓄᓇᕗᒻᒥ ᒪᒃᑯᒃᑐᓂᒃ ᑐᙵᓱᒃᑎᑦᑎᓪᓗᓂᓗ ᐃᓚᐅᔪᓂᒃ ᓇᑭᙶᕈᓘᔭᖅᑐᓂᒃ, ᓇᑭᙶᕈᓘᔭᖅᑐᓂᒃ, ᐃᓅᓯᕐᒥᓗ ᐊᑐᖅᓯᒪᔭᖏᓐᓂᒃ, ᐃᓚᒋᔭᐅᓪᓗᑎᒃ ᑕᐃᒃᑯᐊ 2SLGBTQ+ ᓄᓇᓕᖕᓂ ᐃᓄᐃᓪᓗ ᑕᒪᐃᓐᓂᒃ ᑕᑯᒃᓴᐅᔪᓂᒃ ᑕᑯᒃᓴᐅᙱᑦᑐᓂᒡᓗ ᐊᔪᕈᑎᓕᖕᓂᒃ.