ᕉᔅᒥᐅᓕ ᒎᑦᓯᐊ ᐱᖃᑕᐅᓕᓚᐅᖅᓯᒪᔪᖅ ᖃᐅᔨᒋᐊᖅᑏᑦ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕐᕕᖓᓐᓂ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓪᓗᓂ 2025−ᒥ. ᐃᖃᓗᒻᒥᐅᑕᐅᔅᓴᔪᖅ, ᓯᕗᒃᑲᑕᖅᑎᐅᖃᑦᑕᖅᓯᒪᓪᓗᓂ, ᐊᓪᓚᑦᑎ, ᓄᓇᓕᓐᓂᓪᓗ ᐱᔨᑦᑎᕋᖅᑎᐅᓪᓗᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓄᑦ. ᖃᐅᔨᒪᔭᐅᔪᖅ ᓇᓪᓕᒍᓱᒃᑲᐅᓂᖓᓐᓄᑦ ᐱᓕᕆᖃᑎᖃᕈᒪᑦᑎᐊᖅᑐᓂᓗ, ᕉᔅᒥᐊᓕ ᐱᓕᕆᔪᒪᑦᑎᐊᖅᑐᖅ ᒪᓕᑦᑐᒋᑦ ᐃᓄᐃᑦ ᐅᑉᐱᕆᔭᖏᑦ ᓄᓇᓕᖃᑦᑎᐊᕐᓂᒥᓪᓗ.

ᕉᔅᒥᐊᓕ ᑲᑐᔾᔨᖃᑎᒌᓐᓄᑦ ᐃᖅᑲᓇᐃᔭᖃᑦᑕᖅᓯᒪᔪᖅ ᕿᑭᖅᑕᓂᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᓐᖓᕕᒃᑯᓐᓄᑦ, ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᐱᔨᑦᑎᖃᑦᑕᖅᓯᒪᓪᓗᓂ ᐊᐅᓚᑦᑎᔨᐅᑲᐃᓐᓇᖅᑐᓂ ᓄᓇᕗᑦ ᒐᕙᒪᒃᑯᖏᑕ ᑐᑭᓕᐅᕆᕕᖓᓐᓂ, ᐃᑲᔪᖅᑐᐃᓪᓗᓂᓗ ᑐᑭᓕᐅᕆᔨᓂᒃ ᑐᓵᔨᓂᓪᓗ ᓄᓇᕗᒻᒥ.

ᕉᔅᒥᐊᓕ ᐱᓕᕆᔪᒪᑦᑎᐊᖅᑐᖅ ᓄᓇᕗᒻᒧᑦ ᐱᕈᖅᐸᓪᓕᐊᑎᓪᓗᒍ ᐃᓱᒪᓂᒃᑯᑦ, ᐱᖅᑯᓯᒃᑯᓪᓗ ᑐᓐᖓᕕᖃᕐᓗᓂ ᓯᕗᓕᖅᑎᐅᒋᐊᖓ.

ᐊᒦᓕᐊ ᓯᐸᑕᓕᐊᕐ ᖁᕝᕙᓯᑦᑐᒥᑦ ᐸᐃᑉᐹᓕᒃ (B.A.) (ᖁᕝᕙᓯᓐᓂᖅᐹᒃᑯᑦ) ᖃᓪᓗᓈᑎᑐᑦ ᐊᒻᒪᓗ ᓴᓇᓂᖅᑎᒍᑦ ᑯᐃᓐᔅ ᓯᓚᑦᑐᖅᓴᕐᕕᔾᔪᐊᖓᓐᓂ ᐸᐃᑉᐹᖃᕆᓪᓗᓂ ᐅᖃᓕᒫᒐᓕᕆᓂᕐᒥᑦ ᐅᖃᓕᒫᒐᕋᓛᓐᓂᓪᓗ ᓴᖅᑮᖃᑦᑕᖅᑐᓂᒃ ᖁᕕᐊᓲᑎᖃᕐᓂᒃᑯᑦ ᓯᓚᑦᑐᖅᓴᕐᕕᔾᔪᐊᖓᓐᓂ. ᐱᓕᕆᓯᒪᓪᓗᓂᓗ ᐊᓪᓚᕕᓕᕆᓂᕐᒥᑦ ᑲᓇᑕᐅᑉ ᓴᖅᑮᖃᑦᑕᕐᓂᖏᓐᓂ ᐅᖃᓕᒫᒐᕐᓂᑦ, ᐊᒦᓕᐊ ᑐᓐᖓᓇᑦᑎᐊᖅᑐᓂ ᓄᓇᓕᓐᓄᑦ ᑐᕌᖅᑐᓂᒃ ᑲᒪᓪᓗᓂ ᐊᐅᓚᑦᑎᔨᐅᓪᓗᓂ ᐱᓕᕆᐊᕆᔭᕆᐊᓕᓐᓂᑦ ᐊᓪᓚᕕᓕᕆᓂᕐᒥᓪᓗ ᑕᐃᑲᓂ QHRC−ᑯᓐᓂ.

ᑏᓃᓐ ᐲᑦ, CPA, ᓴᐳᓐᓂᐊᖅᑎᐅᔪᖅ ᑮᓇᐅᔭᓕᕆᔨᒻᒪᕆᐅᓪᓗᓂᓗ ᐃᓚᐅᓕᖅᖢᓂ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒧᑦ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᑮᓇᐅᔭᓕᕆᓂᕐᒧᑦ. QHRC−ᑯᓐᓄᑦ ᐃᓚᐅᓚᐅᖅᑳᕋᓂ, ᑏᓐ ᑕᒻᒪᖅᓯᒪᔪᖅᓯᐅᖅᑎᐅᓚᐅᖅᓯᒪᕗᖅ ᑮᓇᐅᔭᓕᕆᔨᓄᑦ ᓄᓇᕗᒻᒥ, ᐅᖃᐅᔾᔪᐃᕙᒃᖢᓂ ᑲᑐᔾᔨᖃᑎᒌᓄᑦ ᓄᓇᕘᓕᒫᒥ. ᐱᓕᕆᖃᑦᑕᖅᓯᒪᓂᑰᒻᒪᕆᒃᑐᖅ ᐃᑲᔪᖅᑐᐃᓂᕐᒥᒃ ᐃᑲᔪᕋᓱᒃᐸᒃᑐᓂᒃ, ᑮᓇᐅᔭᓕᐅᕋᓱᒃᑎᐅᙱᑦᑐᓂᒃ, ᒥᑭᑦᑐᓂᒡᓗ ᓇᖕᒥᓂᕆᔭᐅᔪᓂᒃ, ᖃᐅᔨᒪᔭᐅᓪᓗᓂᓗ ᓴᙱᔪᒥᒃ ᖃᐅᔨᓴᖅᓯᓂᕐᒧᑦ ᐊᔪᙱᓐᓂᖃᕐᓂᖓᓄᑦ, ᐃᓱᒪᒃᓴᖅᓯᐅᑦᑎᐊᖅᓯᒪᓂᖓᓄᑦ ᑮᓇᐅᔭᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ, ᐊᔪᙱᓐᓂᖃᑦᑎᐊᕐᓂᕐᒥᒡᓗ ᐱᓕᕆᔨᓪᓚᕆᐅᓂᕐᒧᑦ ᐃᓕᓐᓂᐊᖅᓯᒪᓂᕐᒧᓪᓗ ᐱᓕᕆᖃᑦᑕᖅᓯᒪᓂᑰᓂᖓᓄᑦ. ᑏᓐ ᐃᓚᐅᓕᖅᐳᖅ ᐱᓕᕆᖃᑎᒌᒃᑐᓄᑦ ᐱᔪᒪᓂᖃᑦᑎᐊᖅᖢᓂ ᐃᑲᔪᖅᑐᐃᓂᕐᒥᒃ ᖃᐅᔨᒋᐊᖅᑏᑦ ᐱᓕᕆᐊᖏᓐᓂᒃ ᐱᓕᕆᐊᒃᓴᖏᓐᓂᒡᓗ.

ᓯᕗᓪᓕᖅᐹᖏᓐᓂ ᐅᑭᐅᑦ 25−ᓂᒃ, ᐊᐃᒥ ᓄᓇᕗᒻᒥᐅᑕᐅᓚᐅᖅᑐᖅ ᐃᖅᑲᓇᐃᔭᖅᑐᓂ, ᐃᑲᔪᖅᑐᐃᓪᓗᓂ ᓇᔾᔨᔪᓂᑦ ᓂᕿᑎᐊᕙᓕᕆᓂᕐᒥᑦ, ᑎᒥᒃᑯᑦ ᓱᑲᖃᓗᐊᕐᓂᕐᒥᑦ ᐃᓕᓐᓂᐊᑎᑦᑎᓂᕐᒥᑦ, ᓂᕿᑦᑎᐊᕙᓕᕆᓂᕐᒥᑦ ᐋᓐᓂᐊᕕᒻᒥ, ᐅᖁᒪᐃᓐᓂᓂᐊᖅᑐᓕᕆᓂᕐᒧᑦ ᖃᐅᔨᓴᕐᓂᕐᒥᑦ, ᑲᒪᓂᖅᓴᐅᓪᓗᓂ ᐃᓅᓕᑕᕐᓂᑦ ᓂᕿᓕᕆᓂᕐᒥᑦ ᐊᖏᔪᖅᑳᖓᓪᓗᓂ ᐊᕙᑎᑦᑎᕙᓕᕆᓂᕐᒥᓪᓗ. ᐊᑎᖃᖃᑕᐅᔪᖅ ᓂᕿᑦᑎᐊᕙᓕᕆᔨᐅᓪᓗᓂ ᐸᐃᑉᐹᖃᖅᑐᓂ ᖁᕝᕙᓯᓐᓂᖅᐹᒥ ᐃᓄᐃᑦ ᓂᕿᑦᑎᐊᕙᓕᕆᓂᕐᒥᑦ ᐊᒻᒪᓗ ᐃᓱᒪᓕᕆᓂᕐᒥᑦ ᐊᒻᒪᓗ ᐸᐃᑉᐹᖃᖅᑐᓂ (PhD) ᐅᖁᒪᐃᓐᓂᓂᐊᕐᕕᓐᓂᑦ. ᐊᐃᒥ ᖃᐅᔨᓴᖅᑎᒻᒪᕆᒃ ᐃᑲᔪᖅᑎᐅᓪᓗᓂᓗ ᐃᓕᓴᐃᔨᓄᑦ ᐅᖁᒪᐃᓐᓂᓂᐊᕐᕕᓐᓂᑦ ᓯᓚᑦᑐᖅᓴᕐᕕᔾᔪᐊᒥ ᐊᐅᐴᑕᒥ ᐊᒻᒪᓗ ᖃᐅᔨᓴᖅᑎᐅᓪᓗᓂ ᓄᓇᕗᑦ ᖃᔨᐅᓴᖅᑐᓕᕆᔨᒃᑯᓐᓄᑦ. ᑕᕆᐅᑉ ᐊᑭᐊᓃᓐᖔᖅᓯᒪᔪᖅ ᐱᕈᖅᓴᖅᓯᒪᓪᓗᓂ ᓄᓇᒥ ᐃᓅᖃᑎᖏᓐᓂ (Hautanosaurus ᐊᒻᒪᓗ Anishinaabe). ᐃᓚᒥᓂᒃ ᐃᖃᓗᒻᒥᐅᖃᑎᓕᒃ ᒫᓐᓇ.

ᓘᑦᑖᖅ ᔭᓇ ᒪᒃᑲᓚᒃᓚ ᖃᐅᔨᓴᖅᑎᒻᒪᕆᐅᓪᓗᓂ ᐅᖁᒪᐃᓐᓂᓂᐊᕐᕕᓐᓂᑦ ᐸᐃᑉᐹᖅᑐᓂ ᐃᖅᑲᓇᐃᔭᖃᑦᑕᖅᓯᒪᔪᖅ ᐋᓐᓂᐊᕕᒻᒥ ᖃᐅᔨᓴᕐᕕᓂᓪᓗ ᓄᓇᕗᒻᒥ 2006−ᒥᓂᑦ. ᐸᐃᑉᐹᖅᑖᓚᐅᖅᓯᒪᔪᖅ (PhD) ᐅᖁᒪᐃᓐᓂᓂᐊᕐᕕᓐᓂᑦ ᖃᐅᔨᓴᖅᑐᓕᕆᓂᕐᒥᑦ ᓯᓚᑦᑐᖅᓴᕐᕕᔾᔪᐊᕐᒥ ᑐᕌᓐᑐᒥ 2022−ᒥ. ᖃᐅᔨᓴᖅᑐᓂᑦ ᐃᑲᔪᖅᑐᐃᒍᒪᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᑐᖅᑕᐅᖃᑦᑕᖁᓪᓗᒋᑦ ᐋᓐᓂᐊᖅᑐᓕᕆᓂᕐᒥᑦ ᐃᓄᓕᕆᓂᕐᒥᓪᓗ ᐃᓄᓐᓅᖓᔪᓄᑦ.

ᔭᓇ ᐊᕐᕌᒍᓄᑦ ᒪᕐᕉᓐᓂᒃ ᐱᔭᕇᖅᓯᓚᐅᖅᑐᖅ ᐃᓕᓐᓂᐊᓯᓐᓈᖅᑐᓂ ᑮᓇᐅᔭᖃᖅᑎᑕᐅᓪᓗᓂᓗ ᖃᐅᔨᒋᐊᖅᑏᑦ 2025−ᒥ ᒫᓐᓇ ᖃᐅᔨᓴᖅᑎᒻᒪᕆᐅᓪᓗᓂ ᐊᐅᓚᑦᑎᔨᐅᓕᖅᑐᖅ. ᓄᓇᓕᓐᓂᑦ ᐱᓕᕆᖃᑎᖃᖃᑦᑕᖅᑐᓂ, ᐱᒋᐊᕈᑎᓂᒃ ᐃᓕᓐᓂᐊᑎᑦᑎᕙᑦᑐᓂ ᖃᐅᔨᓴᕐᓂᒃᑯᑦ ᕿᒥᕐᕈᓪᓗᓂᓗ ᐱᓕᕆᐊᓂᒃ ᖃᐅᔨᒋᐊᖅᑎᒃᑯᓐᓂ, ᒪᑯᓂᓗ ᐱᓕᕆᓪᓗᓂ ᐃᓅᓱᑦᑐᓂᒃ ᐱᔨᑦᑎᕋᕐᓂᕐᒧᑦ, ᐃᓪᓗᖃᑦᑎᐊᓂᕐᒧᑦ ᓂᕿᔅᓴᖃᑦᑎᐊᕐᓂᒥᓪᓗ, ᐃᑲᔪᖃᑦᑕᖅᑐᓂᓗ ᓂᖓᖅᑕᐅᓯᒪᔪᓂᒃ ᐃᓄᓐᓂᑦ, ᐋᓐᓂᐊᖅᑐᓕᕆᔨᒃᑯᑦ ᑕᐃᒪᐃᓪᓗᐊᑎᑦᑎᓇᓱᐊᕐᓂᕐᒃᑯᑦ ᐱᖁᔭᓕᕆᓂᕐᒥᓪᓗ.

ᐱᓕᕆᖃᑎᖃᕐᒥᔪᖅ ᖃᐅᔨᓴᖅᑐᓕᕆᓂᕐᒧᑦ ᐃᓕᓴᐃᔨᒻᒪᕆᒻᒥᑦ ᖃᐅᔨᓴᖅᑐᓕᕆᓂᕐᒨᖓᔪᓂᒃ ᓯᓚᑦᑐᖅᓴᕐᕕᔾᔪᐊᓐᓂ ᓛᓐᑕᓐ, ᐊᓐᑎᐅᕆᔪᒥ. ᔭᓇ ᓯᕗᓕᖃᖅᑐᖅ ᐊᕙᓐᖓᓂᑐᖄᓗᒃ ᒪᐅᓐᖓᖅᓯᒪᔪᓂᒃ ᐱᕈᖅᓴᓯᒪᓪᓗᓂ ᓄᓇᓕᕐᔪᐊᑉ ᓯᓚᑖᓂ ᒥᒃᒫᒃᑭᒥᑦ. ᒫᓐᓇ ᐃᖃᓗᒻᒥᐅᑕᖅ, ᓄᓇᕗᒻᒥ, ᐃᓚᒌᑦ ᑕᒫᓃᑦᑐᑎᑦ.

ᐋᓐᑐᕆᐊ ᖁᕕᐊᒋᔭᖃᑦᑎᐊᖅᑐᖅ ᐋᓐᓂᐊᖅᑐᓕᕆᓂᕐᒥᑦ ᑕᐃᒪᐃᓪᓗᐊᖅᑎᑕᐅᒋᐊᖃᕐᓂᖏᓐᓂ ᖃᐅᔨᒪᖁᔨᑦᑎᐊᖅᑐᓂ, ᐱᓕᒻᒪᔅᓯᒪᖁᔨᓪᓗᓂ ᐊᒻᒪᓗ ᒪᓂᒪᔾᔪᑎᖃᕈᓐᓇᕐᓗᓂ ᑐᓴᐅᒪᑦᑎᐊᕐᓗᑎᑦ ᐃᓱᒪᓕᐅᕈᓐᓇᖁᓪᓗᒋᑦ ᐋᓐᓂᐊᖅᑐᓕᕆᓂᕐᒨᖓᔪᓂᒃ ᐊᒻᒪᓗ ᐃᓅᓇᓱᐊᑦᑎᐊᕐᓂᕐᒥᑦ. ᓴᓐᖏᑎᒃᑲᓐᓂᕈᒪᓪᓗᓂ ᐱᓕᕆᖃᑎᖃᕈᒪᑦᑎᐊᖅᑐᓂᓗ ᐱᓕᕆᐊᒥᓐᓂᒃ ᑲᒪᑎᓪᓗᒍ ᐃᓅᓱᑦᑐᓂᒃ ᐱᔨᑦᑎᓂᕐᒥᑦ.

ᔭᓂᕗ ᔨᙳᐊ (JJ) ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓴᓇᙳᐊᕐᓂᕐᒧᑦ (ᒪᕐᕉᖕᓂᒃ ᐅᐱᒋᔭᐅᔾᔪᑎᓕᒃ) ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓐᓇᕈᖅᐸᓪᓕᐊᓂᕐᒧᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᖃᐅᔨᓴᕐᓂᕐᒥᒃ ᒪᒃᒫᔅᑐ ᓯᓚᑦᑐᖅᓴᕐᕕᒡᔪᐊᖓᓂ ᐊᓂᒍᐃᓯᒪᒋᓪᓗᓂᓗ ᓯᐅᕆᑕᓐ ᓯᓚᑦᑐᖅᓴᕐᕕᒡᔪᐊᖓᓂ ᐃᓄᓕᕆᔨᐅᓂᕐᒧᑦ − ᐃᓐᓇᕈᖅᐸᓪᓕᐊᔪᓄᑦ ᐱᓕᕆᐊᖑᕙᒃᑐᒥᒃ.

ᑕᐃᒪᙵᑦ 2014−ᖑᓚᐅᖅᑎᓪᓗᒍ, ᔭᐃᔭᐃ ᐱᓕᕆᖃᑎᖃᖃᑦᑕᖅᓯᒪᕗᖅ ᓄᓇᕗᑦ ᒐᕙᒪᒃᑯᓐᓂ, ᐃᖃᓗᖕᓂ ᓄᓇᓕᐸᐅᔭᕐᒥ, ᐊᒻᒪ ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᖏᓐᓂᒃ ᑲᓇᑕᒥ, ᓴᙱᔪᓂᒃ ᑲᑎᙵᖃᑎᖃᓕᖅᖢᑎᒃ ᐃᓄᐃᑦ ᓄᓇᖓᓂ. ᖁᕕᐊᒋᔭᖃᓪᓚᕆᒃᐳᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᑭᒡᒐᖅᑐᐃᓂᕐᒥᒃ, ᐃᑲᔪᖅᑐᐃᓂᕐᒥᒡᓗ ᑲᑐᔾᔨᖃᑎᒌᖕᓂᒃᑯᑦ, ᓴᙱᓂᕆᔭᐅᔪᓂᒃ−ᑐᙵᕕᓕᖕᓂᒃ ᐊᑐᖅᑕᐅᕙᒃᑐᓂᒃ ᐃᑲᔪᖅᐸᒃᑐᓂᒃ ᐃᓄᖕᓂᒃ ᓄᓇᓕᖕᓂᓗ ᑐᑭᖃᑦᑎᐊᖅᑐᓂᒃ, ᓄᓇᓕᖕᓂᒃ−ᐊᐅᓚᑕᐅᔪᓂᒃ ᐊᓯᔾᔨᖅᓯᓂᕐᒥᒃ.

ᐳᕌᑦ ᓴᐃᒻᐳᔅ ᓄᓇᕗᒻᒥᐅᑕᐅᓯᒪᓕᖅᑐᖅ 1999−ᒥᓂᑦ. ᐱᓕᕆᔪᒪᓪᓗᓂ ᐋᓐᓂᐊᖅᑐᓕᕆᓂᒥᑦ ᐃᓕᓐᓂᐊᖅᑐᓕᕆᓂᕐᒥᓪᓗ, ᑐᓐᖓᕕᐅᓱᒋᔭᖏᑦ ᐃᓅᓯᓕᒫᕐᒧᑦ ᐱᓕᕆᐊᕆᔭᓐᓄᑦ. ᐸᐃᑉᐹᖃᖅᑐᓂ (BSc) ᐆᒪᔪᓂᑦ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕐᓂᕐᒥᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᒎᓪᑉ (Guelph), ᐸᐃᑉᐹᖃᖅᑐᓂᓗ (Bachelor) ᐃᓕᓐᓂᐊᖅᑐᓕᕆᓂᕐᒥᑦ ᓚᐃᒃᕼᐃᐊᑦ (Lakehead) ᓯᓚᑦᑐᖅᓴᕐᕕᔾᔪᐊᖓᓐᓂ, ᐸᐃᑉᐹᖃᕆᓪᓗᓂᓗ ᖁᕝᕙᓯᓐᓂᖅᐹᒥ ᓯᕗᓕᖅᑎᐅᓂᕐᒥᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᒎᓪᑉᒥ (Guelph). ᐃᓕᓐᓂᐊᖅᓯᒪᓪᓗᓂ, ᖃᐅᔨᓴᖅᑐᓕᕆᓂᕐᒥᑦ, ᓈᓴᐅᓯᕆᓂᕐᒥᑦ ᓄᓇᕐᔪᐊᓕᕆᓂᕐᒥᓪᓗ ᐃᓕᓐᓂᐊᕕᔾᔪᐊᒥ ᓯᓚᑦᑐᖅᓴᕐᕕᒥᓪᓗ ᐊᒻᒪᓗ ᐊᐅᓚᑦᑎᔨᐅᓯᒪᓪᓗᓂ ᐱᖁᔭᓕᕆᓂᕐᒥᑦ ᐸᕐᓇᓂᕐᒥᓪᓗ ᐃᓕᓐᓂᐊᖅᑐᓕᕆᓂᕐᒥᑦ. ᐃᖃᓗᒻᒥᐅᖃᑎᓕᒃ ᐃᓚᒥᓂᒃ.

ᓈᓐᓯ ᒪᐃᒃ ᐸᓐᓂᖅᑑᒥᐅᔅᓴᔭᖅ, ᓄᓇᕗᒻᒥ. ᒫᓐᓇ ᓂᐊᖁᓐᖒᒥᐅᑕᖅ ᐃᖃᓗᓐᓂᓪᓗ ᑎᓴᒪᓂᒃ ᕿᑐᕐᖓᖃᖅᑐᓂ. ᓈᓐᓯ ᓄᓇᓄᑦ ᓯᓚᑦᑐᖅᓴᕐᕕᖓᓐᓂ ᐃᓕᓐᓂᐊᓚᐅᖅᓯᒪᔪᖅ/ᑎᐅᕼᐊᐅᓯ ᓯᓚᑦᑐᖅᓴᕐᕕᔾᔪᐊᖓᓐᓂ ᐸᐃᑉᐹᖅᑖᖅᑐᓂᓗ (Bachelor of Science) ᐋᓐᓂᐊᓲᑦᑎᐅᓂᕐᒧᑦ. ᐱᓕᕆᖃᑎᖃᕈᒪᐃᓐᓇᓲᖅ ᐃᓄᓐᓂᑦ ᐱᐅᓯᑎᑦᑎᑲᓐᓂᕈᒪᓪᓗᓂ ᐃᓅᓇᓱᐊᑦᑎᐊᒃᑲᓐᓂᖁᔨᓪᓗᓂᓗ, ᖃᐅᔨᒪᔭᖃᑦᑎᐊᖅᑐᖅ ᐃᓄᐃᑦ ᐱᖅᑯᓯᖏᓐᓂ ᐅᖃᐅᓯᖏᓐᓂᓪᓗ.

ᓵᓐᑎ ᐃᒡᓗᓕᒻᒥᐅᔅᓴᔭᖅ, ᐅᑭᐅᒐᓴᓐᓂᑦ ᑲᖏᖅᖠᓂᕐᒥᐅᑕᐅᓚᐅᖅᑐᖅ, ᐃᖃᓗᒻᒥᐅᑕᐅᓂᕋᖅᐸᑦᑐᖅ. ᐱᓕᕆᖃᑦᑕᖅᓯᒪᑦᑎᐊᖅᑐᖅ ᓄᓇᓕᓐᓂ ᑐᓐᖓᕕᖃᖅᑐᑎᑦ ᐃᓄᐃᑦ ᐅᑉᐱᕆᔭᖏᓐᓂ, ᐱᓕᕆᖃᑎᖃᓂᕐᒥᑦ, ᐊᑐᖅᓯᒪᓪᓗᓂᒋᓪᓗ. ᓵᓐᓂ ᓴᓐᖓᑎᑦᑎᑲᓐᓂᕈᒪᔪᖅ ᐃᓅᓇᓱᐊᑦᑎᐊᕐᓂᕐᒥᑦ, ᑭᖑᕚᕇᑦ ᐊᑦᑐᐊᓂᖏᓐᓂ, ᐱᔪᓐᓇᕐᓂᖏᓐᓂ, ᐅᑉᐱᕆᔭᐅᔪᓪᓗ ᐱᒃᑲᓐᓂᖁᔨᓪᓗᓂ ᐃᓚᒌᓐᓂᕐᒥᑦ ᐊᒻᒪᓗ ᐃᓕᑉᐸᓪᓕᐊᖃᑎᖃᕐᓗᓂ ᓄᓇᓕᓐᓂ ᐱᓯᒪᔭᖏᓐᓂ.

ᓯᑕᕙᓂ ᐃᖃᐃᓕᓴᖅᑎᑦᑎᔨ PhD−ᖃᖅᖢᓂ ᐃᖃᐃᓕᓴᕐᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᕐᒥ ᐃᖃᓗᖕᒥᐅᑕᐅᓕᖅᑐᖅ 2024−ᖑᓚᐅᕐᓂᖓᓂᑦ, ᐃᑲᔪᖅᑐᐃᕙᒃᖢᓂ ᐊᔾᔨᒌᙱᑦᑐᓂᒃ ᐃᖃᐃᓕᓴᕐᓂᕐᒧᑦ ᐱᔭᐅᔭᕆᐊᓕᖕᓂᒃ ᓄᓇᓕᖕᒥᐅᓄᑦ ᕿᑭᖅᑖᓗᖕᒥ. ᖃᐅᔨᓴᕈᒪᔭᖏᑦ ᑕᐅᑐᒐᖃᓪᓗᐊᑕᖅᐳᑦ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᖏᓐᓂᒡᓗ ᒪᒃᑯᒃᑐᑦ. ᐃᑲᔪᕈᒪᑦᑎᐊᖅᑐᖅ ᐱᕙᓪᓕᐊᓂᕆᔭᐅᔪᒧᑦ ᑲᑎᖅᓱᖅᓯᒪᔪᓄᑦ ᒪᒃᑯᒃᑐᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᓄᓇᕗᒻᒥ ᐱᓕᕆᖃᑎᒌᖕᓂᒃᑯᑦ, ᐊᑕᖐᔪᒃᑯᑦ, ᓴᙱᓂᕆᔭᐅᔪᑎᒍᑦ−ᑐᙵᕕᓕᖕᓂᒃ ᐊᑐᖅᑕᐅᕙᒃᑐᑎᒍᑦ ᑐᙵᕕᖃᖅᑎᑕᐅᓪᓗᓂ ᓈᓚᖕᓂᒃᑯᑦ, ᐃᓕᖅᑯᓯᑐᖃᒃᑯᑦ ᑐᑭᓯᐅᒪᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐃᒃᐱᒋᔭᖃᑦᑎᐊᕐᓂᕐᒥᒡᓗ ᐃᓄᒃᑎᑐᑦ ᐅᖃᐅᓯᕐᒥᒃ.

ᓘᑦᑖᖅ ᔭᓯᑲ ᐸᓂ ᓄᓇᑦᓯᐊᕗᒻᒥᐅᑕ ᐃᓄᒃ ᐸᐃᑉᐹᓕᒃ (PhD) ᖃᐅᔨᓴᖅᑐᓕᕆᓂᕐᒥᑦ ᐃᓄᓕᕆᓂᕐᒥᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᒐᓛᔅᑰ ᓯᒃᑳᑦᑎᐅᑉ ᓄᓇᖓᓐᓂ. ᐃᓚᖏᑦ ᕆᒍᓚᒻᒥᐅᔅᓴᔭᑦ, ᓛᐸᑐᐊᒥ ᐊᒻᒪᓗ ᑳᐳᓂᐅᒥᑦ, ᓅᐸᓪᓛᒥ, ᐱᕈᔅᓴᓯᒪᔪᖅ ᐃᖃᓗᓐᓂ. ᔭᓯᑲ ᖃᐅᔨᓴᖅᑎ ᒪᑯᓂᖓ ᐃᓅᓇᓱᐊᑦᑎᐊᕐᓂᕐᒥᑦ ᐊᒻᒪᓗ ᐊᑦᑐᖅᑕᐅᖃᑦᑕᕐᓂᖏᓐᓂ ᐃᓄᐃᑦ ᑕᐃᑲᓂ ᒪᔅᑯᕌᑦ ᐹᔅ ᐆᒻᒪᖅᑯᑎᓕᕆᓂᕐᒥᑦ, ᖃᓄᕐᓗ ᐊᑦᑐᐊᓂᖃᕐᒪᖔᑕ ᓯᓚᕐᔪᐊᒥ. ᐸᐃᑉᐹᖃᕐᒥᔪᖅ ᓯᓚᕐᔪᐊᒥ ᐋᓐᓂᐊᖅᑐᓕᕆᓂᕐᒥᑦ, ᐱᔭᕇᖅᓯᒪᓪᓗᓂᓗ ᐱᐅᓴᓐ ᓯᓚᑦᑐᖅᓴᕐᕕᔾᔪᐊᖓᓐᓂ (UWC), ᐸᐃᑉᐹᖃᖅᑐᓂᓗ ᐊᓯᐊᓂ (Commonwealth Scholar). ᔭᓯᑲ ᖃᐅᔨᓴᖅᑎ ᖃᐅᔨᒋᐊᑎᓄᑦ; ᓯᕗᓪᓕᖅᐹᓂ ᐊᐃᑉᐸᖓᓐᓂᓪᓗ ᖃᐅᔨᓴᖅᑐᓕᕆᓂᕐᒥᑦ ᕿᒥᕐᕈᔨᐅᓪᓗᓂᓗ, ᑎᑎᕋᖅᐸᑦᑐᖅ ᖃᐅᔨᓴᖅᑐᓕᕆᓂᕐᒥᑦ ᐅᓂᒃᑳᓕᐅᖅᑐᓂ, ᑭᒡᒐᖅᑐᐃᓪᓗᓂᓗ ᖃᐅᔨᒋᐊᖅᑏᑦ ᖃᐅᔨᓴᖅᑐᓕᕆᓂᕐᒨᖓᔪᓄᑦ ᑲᑎᒪᔨᕋᓛᖏᓐᓄᑦ.

ᔫᕼᐊ ᐅᑭᐅᖅᑕᖅᑐᒥᐅᑕᐅᖏᓐᓇᕈᔪᑦᑐᖅ, ᔨᐊᓗᓇᐃᒦᓚᐅᖅᓯᒪᓪᓗᓂ ᓄᓇᕗᒻᒥᓪᓗ ᓇᒥᑐᐃᓐᓇᖅ 2006−ᒥᓂᑦ. ᐃᖅᑲᓇᐃᔭᖃᑦᑕᖅᑐᖅ ᐊᐅᐴᑕᒥ, ᐱᕈᖅᓴᐃᔪᖅ ᕿᑐᕐᖓᒥᓂᒃ. ᔫᕼᐊ ᐸᐃᑉᐹᓕᒃ ᐅᖁᒪᐃᓐᓂᓂᐊᖅᑐᓕᕆᓂᕐᒥᑦ ᖃᐅᔨᓴᕈᒻᒪᐅᓪᓗᓂᓗ ᐃᑲᔪᖅᑐᐃᔾᔪᑎᓂᒃ ᖁᕝᕙᕆᐊᕆᔪᓐᓇᖅᑐᓂᓪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ.

ᖃᐅᔨᒋᐊᖅᑎᓂᒃ, ᔫᕼᐊ ᐱᓕᕆᔪᓐᓇᕐᓂᕐᒥᓂᒃ ᐊᑐᖅᑐᓂ ᐅᓂᒃᑳᓕᐅᖃᑦᑕᖅᑐᖅ, ᑐᑭᓯᒋᐊᕈᑎᓂᒃ ᖃᐅᔨᓴᖃᑦᑕᖅᑐᓂᒃ, ᖃᐅᔨᓴᖃᑦᑕᖅᑐᓂᓗ ᑕᐃᑲᓂ NU SPOR ᐃᑲᔪᖅᑐᐃᔨᓂᒃ. ᐃᖅᑲᓇᐃᔭᖅᑐ ᓯᓚᑖᓂ, ᓂᖅᑎᐅᕆᐊᔅᓴᒃ ᖁᕕᐊᒋᔭᓕᒃ, ᐊᓃᖃᑎᖃᕈᒻᒪᐅᓪᓗᓂ ᕿᒧᔅᓯᖁᑎᖏᓐᓂ, ᐃᓚᒥᓐᓃᓪᓗᓂᓗ ᐱᖃᓐᓇᕆᔭᒥᓂᓪᓗ.

ᑎᐋᑐᕋ ᐅᐊᔅ ᐸᐃᑉᐸᓕᒃ (Ph.D.) ᐃᓄᓕᕆᓂᕐᒥᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᒪᒧᐊᕆᔪ, ᐸᐃᑉᐹᖃᕆᓪᓗᓂ ᓄᓇᓕᐸᐅᔭᕐᓂᑦ ᐱᕙᓪᓕᐊᓂᕐᒥᑦ ᐳᕌᓐᑕ ᓯᓚᑦᑐᖅᓴᕐᕕᔾᔪᐊᖓᓐᓂ, ᐊᒻᒪᓗ ᐸᐃᑉᐹᖃᖅᑐᓂ (B.A.) ᐃᓄᓕᕆᓂᕐᒥᑦ ᑲᓐᑯᐊᑎᐊ ᓯᓚᑦᑐᖅᓴᕐᕕᔾᔪᐊᖓᓐᓂ. ᐱᕙᓪᓕᐊᔨᕈᖅᐸᓪᓕᐊᓪᓗᓂ ᑳᕈᑕ ᓯᓚᑦᑐᖅᓴᕐᕕᔾᔪᐊᖓᓐᓂ ᐃᓕᓐᓂᐊᖅᑐᓂ. ᐃᓕᓐᓂᐊᖅᓯᒪᔪᖅ ᓯᓚᑦᑐᖅᓴᕐᕕᒻᒥ ᓇᒥᕈᓘᔮᓗᒃ ᐃᓕᓐᓂᐊᖅᑐᓕᕆᓂᕐᒥᑦ, ᒐᕙᒪᒃᑯᓐᓂ ᑮᓇᐅᔭᓕᐅᖅᑎᐅᒐᓱᐊᓐᖏᑦᑐᓂᓪᓗ. ᑎᐋᑐᐊ ᐃᖅᑲᓇᐃᔭᖅᓯᒪᓕᖅᑐᖅ ᓄᓇᕗᑦ ᒐᕙᒪᒃᑯᖏᓐᓄᑦ ᑎᓴᒪᓄᑦ ᐅᑭᐅᓄᑦ, ᐊᖏᔪᖅᑳᖑᓪᓗᓂᓗ ᐅᑭᐅᖅᑕᖅᑐᒥ ᐃᖅᑲᓇᐃᖅᑐᓕᕆᔨᒃᑯᓐᓄᑦ ᐊᒻᒪᓗ ᐊᐅᓚᑦᑎᔨᐅᓪᓗᓂ ᐊᔪᖅᓴᖅᑕᐃᓕᒪᑎᑦᑎᓇᓱᐊᕐᓂᕐᒥᑦ. ᐃᓕᓴᐃᔨᐅᖃᑦᑕᖅᓯᒪᓪᓗᓂ ᖃᔨᐅᓴᖅᑎᐅᖃᑦᑕᖅᓯᒪᓪᓗᓂᓗ ᒪᐅᓐ ᐋᓕᓴᓐ ᒪᒧᐊᕆᔪᒥᑦ, ᔪᐊᒃ, ᐊᒻᒪᓗ ᑕᐅᕼᐊᐅᓯᒥ ᓯᓚᑦᑐᖅᓴᕐᕕᓐᓂᑦ ᑲᓇᑕᒥ, ᐊᒻᒪᓗ UiT−ᓂ: ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒻᒥ ᓄᐊᕙᐃᒥ. ᑎᐊᑦᕋ ᐊᑐᖅᑕᐅᕙᓪᓕᐊᕙᒃᑐᓂᒃ ᖃᐅᔨᓴᖅᑎᐅᕗᖅ, ᐱᓕᕆᖃᑦᑕᖅᓯᒪᓂᑰᓪᓗᓂ ᑕᒪᐃᓐᓂᒃ ᖃᔅᓯᐅᓂᖏᓐᓂᒃ ᐱᐅᓂᖏᓐᓂᒡᓗ ᖃᐅᔨᓴᖅᓯᓂᕐᒥᒃ.

ᓗᐊᕋᓐ ᓇᕙᓐ ᑭᒻᒥᕈᒻᒥᐅᑕᐅᓚᐅᖅᓯᒪᔪᖅ, ᓄᓇᕗᒻᒥ ᑭᓯᐊᓕ ᐃᖃᓗᒻᒥᐅᑕᐅᓂᕋᓕᖅᑐᖅ 2005−ᒥᓂᑦ. ᖃᐅᔨᒋᐊᖅᑎᓂᑦ ᖃᐅᔨᓴᐅᖅᑎᐅᔪᖅ ᑐᑭᓯᒋᐊᕈᑎᓂᓪᓗ ᕿᒥᕐᕈᔨᐅᓪᓗᓂ ᐊᓪᓚᕕᐅᑉ ᐃᓗᐊᓂ ᑭᓱᕈᓘᔮᓗᓐᓂᑦ ᐱᓕᕆᖃᑦᑕᓲᖅ ᐊᓪᓚᕕᐅᓪᓗ ᓯᓚᑖᓂ ᐃᑲᔪᓲᖑᓗᓂ ᖃᐅᔨᓴᖅᑐᓕᕆᓂᕐᒨᖓᔪᓂᒃ. ᐸᐃᑉᐹᖃᖅᑐᓂ ᐃᓱᒪᓕᕆᓂᕐᒧᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᐳᕌᓐᓱᐊ ᐊᒃᔮᕕᒐᐃᒥᑦ ᓅᕙ ᓯᑰᓴᒥᑦ.

ᑐᕋᐃᓯ ᐅᐊᓚᔅ ᐃᓪᓗᓕᒑᕐᔪᒻᒥᐅᔅᓴᔭᖅ, ᓄᓇᕗᒻᒥ. ᑐᕋᐃᓯ ᐱᒃᑯᒋᔭᐅᑦᑎᐊᖅᑐᖅ ᓂᕐᕈᑎᖃᕐᓂᕐᒧᑦ ᓇᒻᒥᓂᖃᕐᓂᒧᓪᓗ ᐊᖏᔪᖅᑳᖑᓪᓗᓂ. ᐸᐃᑉᐹᖃᖅᑐᓂ ᓇᒻᒥᓂᖃᕐᒧᑦ ᐸᐃᑉᐹᓕᕆᔾᔪᓯᑎᓂᒃ ᓂᐅᕐᕈᑎᖃᕐᓂᒨᖔᔪᓂᒃ. ᑐᕋᐃᓯ ᖁᕝᕙᓯᓐᓂᖅᐹᖑᖃᑕᐅᓯᒪᔪᖅ ᐸᕐᓇᓂᕐᒧᑦ ᓯᕗᓕᖅᑎᐅᓪᓗᓂ ᐊᒻᒪᓗ ᐊᖏᔪᖅᑳᖑᓪᓗᓂ ᐊᕐᕌᒍᒐᓴᕐᓄᑦ ᐊᔾᔨᐅᖏᑦᑐᓂᑦ ᐱᓕᕆᖃᑦᑕᖅᓯᒪᓪᓗᓂ ᒐᕙᒪᒃᑯᓐᓂ, ᓇᒻᒥᓂᖅ ᑮᓇᐅᔭᓕᐅᖅᑎᐅᒐᓱᐊᓐᖏᑦᑐᓄᑦᑕᐅ. ᑐᕋᐃᓯ ᕿᓃᓐᓇᓲᖅ ᐱᓕᒻᒪᔅᓴᕈᓐᓇᕐᓂᖓᓐᓂ ᖃᓄᐃᑦᑐᑐᐃᓐᓇᕐᓂᑦ. ᖃᐅᔨᒪᑦᑎᐊᖅᑐᖅ ᐱᒻᒪᕆᐅᓂᖓᓂ ᑐᓴᐅᒪᖃᑦᑕᐅᑎᑦᑎᐊᕐᓂᖅ ᓇᒻᒥᓂᖃᕐᓂᕐᒥᑦ, ᐃᓕᓐᓂᐊᖅᓯᒪᓪᓗᓂᓗ ᖃᕋᓴᐅᔭᒃᑯᑦ ᑎᑎᖅᑐᒐᕐᓂᕐᒥᑦ ᐱᓕᒻᒪᓴᒃᑲᓐᓂᕈᒪᓂᖓᓄᑦ. ᑐᕋᐃᓯ ᖁᕕᐊᒋᔭᖃᖅᑐᖅ ᑐᓴᐅᒪᑎᑦᑎᖃᑦᑕᕐᓂᖓᓐᓂ ᑖᒃᑯᓂᖓ QHRC−ᑯᓐᓂ 2021−ᒥᓂᑦ.

ᓯᐴᓚ ᒨᓐᔅ ᐸᓐᓂᖅᑑᒥᐅᑕᔅᓴᔭᖅ, ᓄᓇᕗᒻᒥ, ᑭᓯᐊᓂᓕ ᐃᖃᓕᒻᒥᐅᑕᐅᓂᕋᖅᑐᖅ ᐊᐃᑉᐸᖓᓪᓗ ᒪᕐᕉᓪᓗ ᐸᓂᖏᒃ. ᓯᐴᓚ ᐸᐃᑉᐹᓕ ᓴᓇᔪᓕᕆᓂᕐᒥᑦ ᑳᕈᑕᓐ ᓯᓚᑦᑐᖅᓴᕐᕕᖓᓐᓂ, ᐸᐃᑉᐹᖃᕐᒥᔪᖅ ᐃᓕᓐᓂᐊᖅᑐᓕᕆᓂᕐᒧᑦ ᓯᓚᑦᑐᖅᓴᕐᕕᖓᓐᓂ ᕆᔭᐃᓇᒥ, ᐱᔭᕇᖅᓯᒪᓪᓗᓂᓗ ᓄᓇᕗᑦ ᓯᕗᓂᔅᓴᕗᒻᒥᑦ. ᓯᐴᓚ ᑲᒪᓪᓗᐊᖅᑐᖅ ᐸᐃᕕᕆᓕᕆᓂᕐᒥᑦ, ᐃᓕᓐᓂᐊᕈᑎᓕᐅᕐᓂᕐᒥᑦ, ᐃᓕᓴᐃᖃᑕᐅᕙᑦᑐᖅ ᒪᑭᒪᐅᑎᒃᓴᓂᒃ ᐃᓅᓱᑦᑐᓂᒃ ᐃᓅᓇᓱᐊᑦᑎᐊᕐᓂᕐᒧᑦ ᐊᒻᒪᓗ ᑎᒍᓯᕙᓪᓕᐊᓂᕐᒥᑦ ᐃᓕᓐᓂᐊᖅᑐᓂᒃ. 2020−ᒥ, ᓯᐴᓚ ᐊᐅᓚᑦᑎᔨᕈᓚᐅᖅᑐᖅ ᓄᓇᕗᒻᒥ NEIHR (ᑐᓴᐅᒪᖃᑦᑕᐅᑎᓂᕐᒧᑦ ᐊᕙᑎᑦᑎᓐᓂ ᓄᓇᖃᖅᑳᖅᓯᒪᔪᑦ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᖅᑐᓕᕆᓃᑦ).

ᔫ ᖃᔮᕐᔪᐊᖅ ᖃᕆᑕᖅ ᐊᕐᕕᐊᓃᓐᖔᖅᓯᒪᔪᖅ. ᔫ ᓄᓇᓕᓐᓂᑦ ᐱᖃᑕᐅᑦᑎᐊᖅᐸᑦᑐᖅ, ᓂᓪᓕᐊᔨᐅᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂ. ᐊᒥᓱᓂᒃ ᐱᓕᕆᖃᑦᑕᖅᓯᒪᔪᖅ ᑭᒃᑯᑐᐃᓐᓇᕐᓄᑦ ᓇᒻᒥᓂᖃᖅᑎᐅᔪᓄᓪᓗ. ᑲᑎᒪᔨᐅᖃᑕᐅ ᐊᖅᑭᐅᒪᕕᒃ ᓴᓴᐃᔭᑎᒃᑯᓐᓄᑦ, ᖃᐅᔨᓴᖅᑎᐅᓪᓗᑎᑦ ᐃᑲᔫᑎᔅᓴᓂᓪᓗ ᐊᑐᐃᓐᓇᖃᖃᑦᑕᖅᑐᑎᑦ ᐃᓅᓇᓱᐊᑦᑎᐊᒃᑲᓐᓂᖁᔨᓂᕐᒨᖓᔪᓂᒃ ᐊᕐᕕᐅᕐᒥᐅᑕᕐᓄᑦ.

ᐊᓖᓯᐊ-ᐃᓚᐃᔭ ᑎᒡᓕᒃ ᐃᓅᓚᐅᖅᓯᒪᔪᖅ ᐃᖃᓗᓐᓂ ᐱᕈᔅᓴᓪᓗᓂᓗ ᐃᓱᒪᓕᕆᓂᕐᒥᑦ ᐱᓕᕆᔪᒪᑦᑎᐊᓲᖅ ᓄᓇᓕᓐᓂᓪᓗ ᐃᓅᓇᓱᐊᑦᑎᐊᕐᓂᒥᑦ. ᐱᔭᕇᖅᓯᓯᒪᔪᖅ ᓄᓇᕗᑦ ᓯᕗᓂᔅᓴᕗᒃᑯᓐᓂ 2023−ᒥ, ᒫᓐᓇ ᐱᔭᕇᔭᖅᐸᓪᓕᐊᓕᖅᑐᖅ ᐃᓕᓐᓂᐊᖅᑕᒥᓂᒃ ᐊᕐᕌᒍᒥ ᑭᖑᓪᓕᖅᐹᒥ ᓄᓇᓕᕆᓂᕐᒧᑦ ᑳᕈᑕᓐ ᓯᓚᑦᑐᖅᓴᕐᕕᔾᔪᐊᖓᓐᓂ. ᐊᓕᓴ ᓄᓇᓕᓐᓂᑦ ᑲᑐᔾᔨᖃᑎᒌᓐᓂ ᐱᓕᕆᖃᑕᐅᕙᑦᑐᖅ ᐃᑲᔪᖅᑐᓂᓪᓗ ᐃᓅᓱᑦᑐᓄᑦ ᐃᑲᔫᑎᓂᒃ ᖃᐅᔨᒋᐊᖅᑎᒃᑯᓐᓄᑦ. ᓴᓇᔨᐅᓯᓐᓈᖅᑐᓂ, ᑎᑎᖅᑎᒐᕆᐊᔅᓴᓪᓗ ᖁᕕᐊᒋᔭᓕᒃ ᐱᕕᖃᕋᐃᒻᒪᑦ. ᐱᔭᕇᖅᑲᑦ, ᐃᓱᒪᓕᕆᔨᒃᑯᓐᓂ ᐃᖅᑲᓇᐃᔭᕈᒪᔪᖅ ᐃᖃᓗᓐᓂ ᐃᓄᓕᕆᓂᕐᒥᑦ ᐸᐃᑉᐹᖃᓕᖅᑲᑦ, ᐊᑐᓕᖁᔨᓪᓚᕆᑦᑐᓂᓗ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐃᖅᑲᓇᐃᔭᖅᑎᓪᓗᒍ.

ᔫᑎ ᑑᑐ-ᐊᕙ ᐃᖃᓗᒻᒥᐅᑕᐅᓂᕋᖅᑐᖅ, ᓄᓇᕗᒻᒥ 2001-ᓂᑦ. ᕿᑐᕐᖓᖏᑦ, ᐃᕐᖑᑕᖏᑦ, ᐃᓗᓕᖏᑦ ᐃᓅᓯᒪᔪᑦ ᑕᒫᓂ ᐱᕈᖅᓯᒪᓪᓗᑎᓗ. ᐅᑉᐱᕆᔭᖃᑦᑎᐊᖅᑐᖅ ᐃᓄᐃᑦ ᐱᖅᑯᓯᖏᓐᓂ ᐊᒻᒪᓗ ᐊᑐᓕᖅᑎᑕᐅᓂᖏᓐᓂ ᐃᓄᐃᑦ ᐃᓕᖅᑯᓯᖏᑦ ᖃᐅᔨᒪᓂᖏ. ᔫᑎ ᐸᐃᑉᐹᓕᒃ ᐅᕕᓂᖃᑎᒋᓐᖏᑕᒥᓂᒃ ᖃᐅᔨᓴᓂᕐᒥᑦ ᓯᓚᑦᑐᖅᓴᕐᕕᔾᔪᐊᒥ ᒪᒧᐊᕆᔪᒥᑦ ᐊᒻᒪᓗ ᒪᓕᒐᓕᕆᔨᐅᓂᕐᒧᑦ ᐃᑲᔪᖅᑎᐅᓂᕐᒥᑦ ᐸᐃᑉᐹᖅᑖᖅᓯᒪᒋᓪᓗᓂ ᑲᐱᓚᓄ ᓯᓚᑦᑐᖅᓴᕐᕕᔾᔪᐊᖓᓐᓂ. ᐃᓅᓯᓕᒫᓂᒃ ᐃᓕᓐᓂᐊᖅᑐᖅ ᒪᑐᐃᖓᐃᓐᓇᖅᑐᖅ ᐃᓕᒍᒪᔪᖅ ᑭᓱᑐᐃᓐᓇᑦᑎᐊᕐᓂᑦ.

ᐊᐃᐳᓗ ᐲᑕᔅ ᐸᐃᑉᐹᓕᒃ ᓂᕿᑦᑎᐊᕙᓕᕆᔨᐅᓪᓗᓂ ᓄᓇᕗᒻᒥᐅᑕᐅᓪᓗᓂ ᐅᑭᐅᓄᑦ 11−ᓄᑦ ᐃᖅᑲᓇᐃᔭᓕᖅᑐᖅ ᑕᒫᓂ, ᐃᑲᔪᖅᑐᐃᓲᖅ ᓄᓇᓕᓐᓂᑦ ᓂᕿᑦᑎᐊᕙᓕᕆᓂᕐᒥᑦ ᓱᑲᖃᓗᐊᖅᑐᓂᓪᓗ ᑎᒥᒥᑎᒍᑦ, ᐆᒻᒪᑎᓕᕆᓂᕐᒥᑦ, ᓇᔾᔨᓇᓱᑦᑎᐊᕐᓂᕐᒥᑦ, ᐊᒻᒪᓗ ᕿᑐᕐᖓᓂᓪᓗ ᓂᕆᑎᑦᑎᑦᑎᐊᕐᓂᕐᒥᑦ, ᕿᒥᕐᕈᓲᖅ ᖃᓄᖅ ᓂᕿᔅᓴᖃᑦᑎᐊᕈᓐᓇᕐᒪᖔᑕ ᒪᒪᕆᓗᒋᑦ ᐱᔪᒪᔭᒥᓂᓪᓗ ᐱᔪᓐᓇᕐᓗᑎᑦ. ᐸᐃᑉᐹᖃᕐᒥᔪᖅ ᐅᖁᒪᐃᓐᓂᓂᐊᕐᕕᓐᓂᑦ ᓄᓇᖃᖅᑳᖅᓯᒪᔪᓂᒃ ᐋᓐᓂᐊᖅᑐᓕᕆᓂᕐᒥᑦ ᐊᒻᒪᓗ ᖁᕕᐊᒋᔭᓕᖅ ᖃᐅᔨᒪᔭᑐᖃᕐᓂᑦ ᖃᓄᖅ ᐊᑐᖅᑕᐅᔪᓐᓇᕐᒪᖔᑕ ᐅᓪᓗᒥᒧᑦ ᐋᓐᓂᐊᖅᑐᓕᕆᓂᕐᒥᑦ ᐱᐅᓯᕚᓪᓕᑲᓐᓂᖁᓪᓗᒋᑦ ᐃᓄᐃᑦ ᓄᓇᓕᖏᑦ. ᐊᐃᐳᓗ ᖁᕕᐊᓪᓚᕆᑦᑐᖅ ᑕᒪᑐᒥᖓ ᐃᑲᔪᕈᓐᓇᓂᕐᒥᓂᒃ ᑕᐃᑲᓂᓗ ᐃᖏᕐᕋᔪᓂᒃ ᖃᐅᔨᒋᐊᖅᑎᒃᑯᓐᓂ. ᐃᖃᓗᒻᒥᐅᑕᖅ ᐃᓚᖏᓪᓗ, ᐆᒪᔪᓪᓗ ᑎᒍᐊᖏᑦ, ᐊᒻᒪᓗ ᓄᓇᓕᓐᓂᑦ ᐱᔨᑦᑎᕈᒪᐃᓐᓇᖅᑐᓂ.

ᓖᓇ ᐅᑲᓕᖅ ᐱᕈᖅᓴᓚᐅᖅᑐᖅ ᐃᖃᓗᐃᑦ, ᓄᓇᕗᒻᒥ, ᑭᓯᐊᓂ ᔭᓗᓇᐃᒥ ᓄᓇᖃᖅᓯᒪᓕᖅᑐᖅ ᐊᕐᕌᒍᒐᓴᖕᓄᑦ. ᖃᐅᔨᒋᐊᖅᑎᒃᑯᓐᓄᑦ ᓄᑖᖑᖃᑕᐅᔪᖅ ᑎᑎᕋᖅᓯᒪᔪᓄᑦ ᖃᐅᔨᓴᖅᑕᐅᓂᑯᓄᑦ ᖃᐅᔨᒪᔨᑕᖅ; ᑕᕝᕙᓂ ᐱᓕᕆᐊᒃᓴᒥ, ᐱᓕᕆᖃᑎᖃᕐᓂᐊᖅᐳᖅ ᓄᓇᕗᒻᒥ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᐊᒻᒪ ᓄᓇᕗᒻᒥ SPOR−ᑯᓐᓂ. ᐅᑭᐅᑦ 25 ᐅᖓᑖᓂ ᐱᓕᕆᖃᑦᑕᖅᓯᒪᓂᑰᕗᖅ ᑎᑎᕋᖅᓯᒪᔪᓂᒃ ᖃᐅᔨᓴᖅᑕᐅᓂᑯᓂᒃ ᐊᒻᒪ ᑐᑭᓯᒋᐊᒐᒃᓴᓂᒃ, ᐃᓕᓐᓂᐊᕆᓪᓗᓂ ᐋᓪᐴᑕᒥ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓴᐃᔨᙳᕆᐅᖅᓴᓂᕐᒧᑦ ᐃᓕᑕᕆᔭᐅᔾᔪᑎᑖᕋᓱᒃᖢᓂ.

ᓘᒃᑖᖅ ᑎᐴᓚ ᐅᑯᓪ ᑎᑎᖅᑲᓂᒃ ᖃᐅᔨᒪᔨᒻᒪᕆᐅᕗᖅ ᖃᐅᔨᓴᖅᑐᓕᕆᓂᕐᒥᒃ ᐊᒻᒪ ᑎᑎᖅᑲᓂᒃ ᖃᐅᔨᓴᕐᓂᕐᒥᒃ, ᐱᓕᕆᐊᖃᓪᓗᐊᑕᖅᖢᓂ ᑕᒪᐃᓐᓂᒃ ᐱᐅᓂᖏᓐᓂᒃ ᐊᒻᒪ ᐅᓄᕐᓂᖏᓐᓂᒃ ᐱᓕᕆᔾᔪᓯᕐᓂᒃ. ᐃᖅᑲᓇᐃᔭᖃᑦᑕᖅᓯᒪᔪᖅ ᐃᓕᓐᓂᐊᕐᕕᒡᔪᐊᓂ ᐊᒻᒪ ᐊᑐᖅᑕᐅᔪᓂᒃ ᖃᐅᔨᓴᖅᑐᓕᕆᓂᕐᒥᒃ, ᐱᓗᐊᖅᑐᒥ ᖃᐅᔨᓴᖅᑎᐅᖃᑕᐅᓪᓗᓂ ᓯᓚᑦᑐᖅᓴᕐᕕᒡᔪᐊᕐᒥ ᑳᓪᒍᕆᒥ, ᑕᐃᑲᓂᓗ ᐃᑲᔪᖅᑐᐃᖃᑦᑕᖅᓯᒪᓪᓗᓂ ᓄᓇᓕᖕᓂ−ᑐᙵᕕᓕᖕᓂᒃ ᖃᐅᔨᓴᕐᓂᕐᒥᒃ ᑕᐅᑐᒐᖃᓪᓗᐊᑕᖅᑐᓂᒃ ᓇᓕᒧᒌᒃᑎᑦᑎᓂᕐᒥᒃ, ᖃᐅᔨᓴᖅᓯᓂᕐᒥᒃ ᐱᕋᔭᒍᑕᐅᕙᒃᑐᓂᒃ ᐃᓅᖃᑎᒌᖕᓂᕐᒧᓪᓗ ᐊᒃᑐᖅᓯᓂᕆᕙᒃᑕᖏᓐᓂᒃ.

ᑎᐴᓚ PhD−ᖃᖅᐳᖅ ᐊᐅᓚᑦᑎᕝᕕᖃᖅᐸᖕᓂᕐᒥᒃ ᐊᐅᓚᑦᑎᕝᕕᖃᖅᐸᖕᓂᕐᒧᓪᓗ ᐃᓕᖅᑯᓯᕆᔭᐅᕙᒃᑐᓂᒃ (2021−ᒥ) ᐅᑯᓇᙵᑦ, Universiti Teknologi Malaysia−ᒥ. ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᖅᓯᒪᖕᒥᔪᖅ ᓯᓚᑐᓂᕐᒥᒃ ᐊᒻᒪ ᑎᑎᕋᖅᓯᒪᔪᓂᒃ ᖃᐅᔨᓴᖅᑕᐅᓂᑯᓂᒃ ᖃᐅᔨᓴᕐᓂᕐᒥᒃ, ᐊᒻᒪᓗᑦᑕᐅᖅ ᓯᕗᕙᓯᖕᓂᖅᓴᒥᒃ ᐱᓕᒻᒪᒃᓴᖅᓯᒪᓪᓗᓂ ᐱᐅᓂᖏᓐᓂᒃ ᖃᐅᔨᓴᕐᓂᕐᒥᒃ ᑳᓪᒍᕆᒥ ᓯᓚᑦᑐᖅᓴᕐᕕᒡᔪᐊᕐᒥ. ᑎᐴᓚ ᐃᑲᔪᖅᑐᐃᓂᐊᕆᕗᖅ IYS ᐊᒻᒪ NU SPOR ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ.

ᒪᕆᐊ ᑰᑦᔅ 15−ᓂᒃ ᐊᕐᕌᒍᓂᒃ ᐱᓕᕆᖃᑦᑕᖅᓯᒪᓂᑰᕗᖅ ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᑮᓇᐅᔭᓂᒃ ᐱᕈᖅᓴᐃᓂᕐᒥᒃ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᑲᑐᔾᔨᖃᑎᒌᓄᑦ ᓴᓇᙳᐊᖅᑐᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᓄᑖᙳᖅᐸᓪᓕᐊᔪᓄᑦ, ᐊᒻᒪ ᐃᓅᖃᑎᒌᓄᑦ ᐊᒃᑐᐃᔾᔪᑕᐅᕙᒃᑐᓄᑦ. 2018−ᖑᓚᐅᕐᓂᖓᓂᑦ, ᐃᑲᔪᖅᑐᐃᖃᑦᑕᖅᓯᒪᕗᖅ ᑲᑐᔾᔨᖃᑎᒌᓂᒃ ᓄᓇᕗᒻᒥ ᐱᓇᔪᒍᑕᐅᔪᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᐊᔪᙱᓐᓂᕆᔭᐅᔪᓂᒡᓗ ᐋᖅᑭᒃᓱᐃᕙᓪᓕᐊᓂᕐᒥᒃ. ᒪᕆᐊ ᐊᖏᖅᓯᒪᓂᖃᖅᑐᖅ ᑲᑐᔾᔨᖃᑎᒌᓐᓂᕐᒥᑦ, ᓄᓇᓕᓐᓂᑦ-ᑐᕌᒐᖃᕐᓂᕐᒥᑦ ᐱᓕᕆᔾᔪᓯᕐᓂᑦ ᓴᙱᓕᑎᑦᓯᓂᕐᒥᑦ ᓄᓇᖃᖅᑳᖅᓯᒪᔪᓄᑦ-ᐊᐅᓚᑕᐅᔪᓂᑦ ᐱᓕᕆᐊᖑᕙᓪᓕᐊᔪᒪᔪᓂᑦ ᐊᑯᓂᐅᔪᒧᓪᓗ ᑲᑐᔾᔨᖃᑎᒌᓄᑦ ᐱᕈᖅᐸᓪᓕᐊᓂᕐᒥᑦ.

ᒦᒐᓐ ᐱᕈᖅᓴᓚᐅᖅᑐᖅ ᐋᑐᕚ, ᐋᓐᑎᐅᕆᐅᒥ, ᐃᖃᓗᖕᓂ ᐊᖏᕐᕋᕆᓂᕋᖅᖢᓂᐅᒃ 2008−ᒥ 2022−ᒧᑦ. ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᖅᓯᒪᔪᖅ ᖃᐅᔨᓴᖅᑐᓕᕆᓂᕐᒥᒃ ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂ ᐊᒻᒪ ᐃᓕᑕᕆᔭᐅᔾᔪᑎᑖᖅᓯᒪᓪᓗᓂ ᖃᐅᔨᓴᖅᑐᓕᕆᓂᕐᒥᒃ ᒪᒃᒫᔅᑐ ᓯᓚᑦᑐᖅᓴᕐᕕᒡᔪᐊᕐᒥ. ᒦᒐᓐ ᐃᓚᐅᓕᓚᐅᖅᐳᖅ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒧᑦ 2021−ᒥ ᖃᐅᔨᓴᖅᑎᓄᑦ ᐃᑲᔪᖅᑎᐅᓪᓗᓂ ᒫᓐᓇᓗ ᐊᐅᓚᑦᑎᔨᒋᔭᐅᓕᖅᖢᓂ ᓄᓇᓕᖕᓂ ᖃᐅᔨᓴᖅᑐᓕᕆᓂᕐᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᖃᐅᔨᒋᐊᖅᑎᒃᑯᓐᓄᑦ ᐃᓚᐅᓚᐅᖅᑳᕋᓂ, ᑐᑭᒧᐊᒃᑎᑦᑎᔨᐅᓚᐅᖅᑐᖅ ᓴᓇᔪᓕᕆᓂᕐᒧᑦ ᐊᒻᒪ ᑲᔪᓰᓐᓇᕈᓐᓇᕐᓂᕐᒧᑦ ᐃᖃᓗᖕᓂ ᓄᓇᓕᐸᐅᔭᕐᒧᑦ.

ᐄᑕᓐ ᐃᓐᑕᓗ ᖃᐅᔨᒋᐊᖅᑏᑦ ᖃᓄᐃᖏᑦᑎᐊᕐᓂᕐᒧᑦ ᖃᐅᔨᓴᕐᕕᖕᒧᑦ ᐃᓚᐅᓕᖅᐳᖅ ᐃᒡᓗᕐᔪᐊᓄᑦ ᐊᐅᓚᑦᑎᔨᐅᓪᓗᓂ. ᐊᐃᑕᓐ ᐃᖅᑲᓇᐃᔭᖃᑦᑕᕆᕗᖅ ᓄᐊᑦᕕᔅᑎᐅᓪᑯᓐᓄᑦ ᐊᕐᕌᒍᒐᓴᖕᓄᓪᓗ ᐱᓕᕆᖃᑦᑕᖅᓯᒪᓂᑰᓪᓗᓂ ᐊᐅᓚᑦᑎᓂᕐᒥᒃ ᐃᓂᒋᔭᐅᔪᒥᒡᓗ ᐊᐅᓚᑦᑎᕝᕕᖃᖅᐸᖕᓂᕐᒥᒃ, ᐊᒻᒪᓗᑦᑕᐅᖅ ᐱᓕᕆᖃᑦᑕᖅᓯᒪᓂᑰᓪᓗᓂ ᐊᐅᓚᑦᑎᕝᕕᖃᖅᐸᖕᓂᕐᒥᒃ. ᐱᓕᕆᖃᑎᒌᒃᑐᓄᑦ ᐃᓚᐅᓕᖅᐳᖅ ᐊᒥᖅᑳᖃᑎᖃᖅᖢᓂ ᐃᓱᒪᒋᔭᖃᖅᐸᒃᖢᓂ ᐃᑲᔪᖅᑐᐃᓂᕐᒥᒃ ᖃᐅᔨᒋᐊᖅᑏᑦ ᐱᓕᕆᐊᒃᓴᕆᑎᑕᐅᔭᖏᓐᓂᒃ ᐱᓕᕆᐊᕆᕙᒃᑕᖏᓐᓂᒡᓗ ᓄᓇᓕᖕᓂ.

ᒪᐃᑑ ᐃᒡᐳᓴᓐ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᖕᒧᑦ ᐃᓚᐅᓕᖅᐳᖅ ᐅᖄᓚᕕᐅᔪᓐᓇᖅᐸᒃᖢᓂ ᐃᓂᒋᔭᐅᔪᓄᑦ ᐊᐅᓚᑦᑎᔨᒋᔭᐅᓪᓗᓂ. ᒪᐃᑑ ᐱᓕᕆᖃᑦᑕᕆᕗᖅ ᐃᒡᓗᕐᔪᐊᓄᑦ ᐊᐅᓚᑦᑎᔨᐅᓪᓗᓂ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ ᐃᖃᓗᖕᓂ ᐃᓕᓐᓂᐊᖅᓯᒪᑦᑎᐊᖅᖢᓂᓗ ᐃᒡᓗᐃᑦ ᓴᓇᒪᓂᖏᓐᓂᒃ, ᑎᑎᕋᐅᔭᖅᑎᓂᒃ, ᐊᒻᒪ ᐊᐅᓚᑦᑎᔨᓂᒃ. ᓇᒃᓴᖅᐳᖅ ᐊᖏᔪᒻᒪᕆᖕᒥᒃ ᐃᓂᒋᔭᐅᔪᓂᒃ ᐊᐅᓚᑦᑎᕝᕕᖃᖅᐸᖕᓂᕐᒥᒃ ᓴᙱᔪᒥᒡᓗ ᐱᓕᕆᐊᖃᓪᓚᕆᒍᒪᕙᒃᖢᓂ ᐃᑲᔪᖅᑐᐃᓂᕐᒥᒃ ᐃᓂᒋᔭᐅᕙᒃᑐᓂᒃ ᓄᓇᓕᖕᓂ ᐱᓕᕆᐊᖑᕙᒃᑐᓂᒃ ᖃᐅᔨᓴᖅᓯᓂᕐᒧᓪᓗ ᐃᓂᒋᔭᐅᕙᒃᑐᓂᒃ.